Wednesday, March 3, 2010

ਮਰਣ ਤੋਂ ਪਹਿਲਾਂ

ਮਰਣ ਤੋਂ ਪਹਿਲਾਂ
ਕੀ ਹੈ ਜਿੰਦਗੀ?

ਸਾਹਾਂ ਦੀ ਕੱਚੀ ਡੋਰ
ਆਸਾਂ ਦੀ ਚਰਖੜੀ

ਤੇਜ ਹਵਾਵਾਂ 'ਚ ਡੋਲਦੀ
ਪਤੰਗ

ਖਿੱਚ ਯਾਰ
ਮਾਰ
ਦੋ ਚਾਰ
ਹਝਕੇ

ਕਰ ਹਵਾਵਾਂ ਤੋਂ ਉੱਪਰ

ਇਹ ਅਡੋਲ ਰਹੇ !
----0----0---
ਕਵਿਤਾ

ਪੁੰਨ ਨਿਮਾਣੇ ਅਰਥਾਂ ਦਾ
ਖੱਟਾਂ ਤਾ ਖੱਟਾਂ ਯਾਰ ਕਿਸ ਤਰਾਂ
ਪਹਿਰਣ ਦੇਵਾਂ ਲਫਜਾਂ ਦੇ
ਰੇਸ਼ਮੀ ਜਾਂ ਮਖਮਲੀ

ਭਟਕਦੇ ਗੀਤਾਂ ਨੂੰ ਆਖੋ
ਬੈਠਣ ਦੋ ਘੜੀ
ਐਂਵੇ ਨਾ ਜਾਣ ਬੇ-ਸਬਰੇ
ਹੋਰ ਤੁਰੀ

ਉਮਰਾਂ ਦੀ ਤਿੱਖੀ ਧੁੱਪੇ
ਉਡਿਆ ਗੀਤਾਂ ਦਾ ਰੰਗ
ਗੀਤ ਮੇਰੇ ਭਟਕ ਗਏ
ਪੁਗਾਈ ਮਾਰੂਥਲ ਅੜੀ

ਸੋਨੇ ਦੇ ਜੰਗਲ 'ਚੋਂ ਲੱਭਦਾ
ਚਾਂਦੀ ਦੇ ਕੁੱਝ ਬੀਜ ਪੁੰਗਰੇ
ਨਾ ਕੋਈ ਕਵਿਤਾ ਦੇ ਫੁੱਲ ਖਿੜੇ
ਨਾ ਕਿਸੇ ਗੀਤ ਦੀ ਪੱਤ ਹਰੀ
----0---000---

Tuesday, March 2, 2010

ਗੀਤ

ਆ ਅਰਸ਼ਾਂ ਦੀ ਪਰੀਏ ਨੀਂ
ਆ ਰੱਜ ਕੇ ਗੱਲਾਂ ਕਰੀਏ ਨੀਂ

ਇਹ ਦੁਨੀਆਂ ਇੱਕ ਮੇਲਾ ਹੈ
ਇਥੇ ਹਰ ਇੱਕ ਦਾ ਨਵਾਂ ਝਮੇਲਾ ਹੈ
ਮੁਹੱਬਤਾਂ ਕਰੀਏ ਤਾਂ ਕਰੀਏ
ਨਾ ਲੋਕਾਂ ਕੋਲੋਂ ਡਰੀਏ ਨੀਂ

ਜੇ ਖੁਸ਼ਬੂ ਤੇਰੀ ਛੋਹ ਜਾਵੇ
ਮੇਰੀ ਬੱਲੇ ਬੱਲੇ ਹੋ ਜਾਵੇ
ਹਾਏ ਦੂਰ ਦੂਰੀਆਂ ਕਰੀਏ
ਆ ਹੱਥਾਂ ਵਿੱਚ ਹੱਥ ਫੜੀਏ ਨੀਂ

ਗਾਵਾਂ ਗੀਤ ਜੇ ਤੇਰੇ ਪਿਆਰ ਦੇ
ਭੈੜੇ ਲੋਕੀਂ ਤਾਹਨੇ (ਬੜੇ) ਮਾਰਦੇ
ਇੱਕ ਦੂਜੇ ਲਈ ਹਾਮੀ ਭਰੀਏ
ਨਾ ਲੋਕਾਂ ਕੋਲੋਂ ਡਰੀਏ ਨੀਂ

ਇੱਕ ਗੱਲ ਮੇਰੀ ਮੰਨੀਂ ਜਰੂਰ ਤੂੰ
ਨਾ ਤੋੜੀਂ ਮੇਰੀ ਪੱਗ ਦਾ ਗਰੂਰ ਤੂੰ
ਬੇਬੇ ਦੇ ਚਰਨੀਂ ਸਿਰ ਧਰੀਏ
ਆ ਉਂਗਲ ਬਾਪੂ ਦੀ ਫੜੀਏ ਨੀਂ

ਜੇ ਖੁਸ਼ਬੂ ਤੇਰੀ ਛੋਹ ਜਾਵੇ
ਫਿਰ ਸ਼ਰਨੀਂ ਸ਼ਰਨੀਂ ਹੋ ਜਾਵੇ
ਫਿਰ ਸੇਖੋਂ ਸੇਖੋਂ ਹੋ ਜਾਵੇ
ਹਾਏ ਦੂਰ ਦੂਰੀਆਂ ਕਰੀਏ
ਆ ਹੱਥਾਂ ਵਿੱਚ ਹੱਥ ਫੜੀਏ ਨੀ..

ਆ ਅਰਸ਼ਾਂ ਦੀ ਪਰੀਏ ਨੀਂ
ਆ ਰੱਜ ਕੇ ਗੱਲਾਂ ਕਰੀਏ ਨੀਂ


- ਧਰਮਿੰਦਰ ਸੇਖੋਂ ਬੋੜਾਵਾਲ
+919876261775